A cociñeira e blogueira Rocío Garrido ofreceu no “Obradoiro de Pinchos de Botelo” ideas para comer o botelo dun xeito diferente ao tradicional. O obradoiro púxose en marcha na tarde do luns 18 de xaneiro coa colaboración do Restaurante Piquiño que ofreceu as súas instalacións e das adegas: Godeval, Eladio Santalla Paradelo, Roandi e Cooperativa Xesús Nazareno que aportaron os viños para a posterior harmonización cos pratos preparados.

Vinte persoas, entre hostaleiros e afeccionados, participaron nesta actividade na que aprenderon en directo como elaborar 4 pinchos de botelo e despois catáronos cos viños seguindo as explicacións do sumiller Jorge Cardoso.  Os asistentes foron dando as súas opinións sobre cada prato e tamén ficaron sorprendidos das harmonías entre eles.

Os catro pratos elaborados e as maridaxes que se realizaron foron:

• “Botelo en camisa de repolo” co godello de Godeval, anada 2014.
• “Arroz cremoso con botelo, setas e queixo do Cebreiro” co escumoso Brut Brinde de Adega Roandi.
• “Hummus de garavanzos con botelo sobre pan de gambas” co godello Hacienda Ucediños de Adega Eladio Santalla Paradelo, anada 2015.
• “Croqueta invertida de botelo” co mencía ,12 meses de barrica, Valdouro de Cooperativa Xesús Nazareno.